Høgt oppe i Prestberget med utsyn over Vågåmo, ligg frilusftsmuseet Jutulheimen. Kring tunet står ni hus, mellom anna ein låve, to stover og ei smie, sett opp som ein gamal storgard. Husa er frå 1600-, 1700- og 1800-talet og kjem frå ulike gardar i Vågå.

Jutulheimen er kalla opp etter næraste ”naboen”, trollet Jutulen, og har aldri vore ein gard. Porten inn til Jutulen ser du i berget like under Jutulheimen. Eventyrsankarane Asbjørnsen og Moe gjorde Jutulporten kjent i heile Noreg då dei skreiv ned eventyret om ”Jutulen og Blessomen”. Våre omvisarar fortell deg gjerne korleis det heile gjekk føre seg.

Om sommaren er det omvisar på tunet som syner deg husa, utstillingane og fortel om Jutulen og andre historier du knapt kan tru er sanne. Haust og vår er det kveldsseto og dugurdstreff eit par gonger i månaden i Jutulheimen. Alle er velkomne til å smake på tradisjonell mat og høyre spanande foredrag.

Utstillingar

Kvar sommar er det eller fleire utstillingar i Jutulheimen. Miniutstillingar med gjenstandar og bilete frå museumssamlinga finn du i husa heile året. I 2018 er det utstilling om Jo Gjende, felemakarverkstad og nyopna utstilling om folkemusikkinstrument, frå samlinga etter Leif Løchen. Utstillinga er laga av Eirik Haugen, Tom Willy Rustad og Trond Ole Haug - alle ved museet.

Lydløypa om Munch i Vågå endar/startar i Jutulheimen, dei andre lyddusjane er i Ullinsvin, kyrkja og Veistadhjørnet i Vågåmo.

Utleige

Bryllaup, dåp, konfirmasjon, firmamøte eller anna sosialt lag? Sundstugu og Øyastugu kan leigas på timebasis heile året. I Øyastugu er det fullt kjøken med dekketøy til kring 70 personar.

Ta kontakt for utleige eller omvising utanom opningstid.