Perposten
Speidarane på Lesja har i 1934 løysinga på problem med stress i julestria. I ei gamal handskriven "avis" frå 1930-40-talet, "Per-Posten", skildrar dei korleis ein kan kome seg bort frå mas og kjas.
Når allt er gjort frå seg og dagen lid Då samlar bålet til moro ei rid Med songar og stubbar alvor og tøys
Det ser ut til at speidartroppa vart starta rett før jul i 1931, og dei fyrste sidene i "avisa" er frå 1932 eller 1933. Det er ei blanding av referat frå aktivitetane i laget, og lengre stykke med med framtidsfantasiar og flotte illustrasjonar - mange fullt på høgde og i same ånd som Kjell Aukrust.
Per R. Einbu (1918–2013) var nok ein sentral gut i gruppa. Han har mange flotte illustrasjonar og tekster i "avisa", som her frå julenummeret i 1934. Han dreiv seinare i livet mykje med både teikning, måling og treskjering. Han har m.a. illustrert Bygdebok for Lesja med teikningar av alle gardane i bygda, teikna alle setrene i Lesja i boka Setrane i Lesja, og illustrert fleire andre bøker o.l. Frå 1960 budde han i Søndre Land og arbeidde ved Hov Møbelindustri, og han har dekorert fleire bygningar med måleri i Land-kommunane.
Gudbrandsdalsmusea sin adventskalender byr på levande historiar kvar dag fram til jul. Vil du vere med, så heng på her inne, eller følg oss på Instagram eller Facebook.
Frå julenummeret i 1934.
I Lesja
Den 18 desember er troppa tri år Ja er det kje rart som tida går Arbeidet skiftar med ålvor og song Med turer og ferder imillom eingong. Når dalen stundom blir oss forheit So må du kje tru at me står ibeit Då dreg me til fjells for det friskar so upp og koma til seters ein liten trupp. Når allt er gjort frå seg og dagen lid Då samlar bålet til moro ei rid Med songar og stubbar alvor og tøys til rosignalet jagar alle til køys. Speiderlivet er utan like kongar er me i vort eige rike Difor er speidarguten aldri sturen Sorga den la med att i naturen.
P. E.