9. desember - Luke 25

25 luker i adventskalenderen! For godt til å vere sant tenkjer du kanskje. Men i 1947 var det faktisk slik. Finn du luke 25 på bildet?

Speiderpikane var nesten fyrst ute med å lage og selje adventskalendrar i Noreg da dei kom med denne i 1947. Kalenderen hadde 25 luker fordi den starta på den fyrste sundagen i advent, som det året var 30. november. Året etter og i alle år sidan, hadde kalenderen 24 luker. Kalenderen var teikna av Elisabeth Boye Gregersen som både var speidar og kunstnar.

I 1912 fekk Noreg sin fyrste reine jentespeidar-tropp. Jentespeiding var grensesprengande den gong. Det var ikkje vanleg at jenter gjekk tur i skog og mark, sov i telt eller fekk leiaropplæring. Likevel verkar det ikkje som om det var tvil om at det var nettopp det «barske» friluftslivet som tiltrekte dei. I ein leiarhandbok for Noreg sine KFUK-speidarar frå 1990 står det under overskrifta "Kvinnesak i vårt forbund - før og nå":

"Det er nok temmelig sikkert at det i hvert fall ikke var kvinnesak som fikk de første jentene til å interessere seg for speiderarbeidet. Snarere tvert imot. Det var det barske ved speidingen som tiltalte dem, friluftslivet - for ikke å si villmarkslivet, uniformen, turutstyret, speiderstaven - alt som kalte på eventyrlysten, opplevelsestrangen i dem.»

Likevel fekk ikkje jentene sove i telt dei fyrste åra. Fyrst ut på 1930-talet skjønte folk at også jentene klarte seg fint under ein tynn duk.

Det er fornøyeleg å lese om arendalsspeidarane sin tur sommaren 1924:

«Jentene tok båt fra Arendal og kom seg videre til Kristiania fra Brevik. Neste etappe var Bergensbanen til Gol og vandring mot Hemsedal og Skogshorn. Derfra gikk turen til fots over fjellet mot Vang i Valdres. Etter et par dagers hvile, gikk de over Filefjell og ned gjennom Lærdal til Sognefjorden. Der unnet de seg en rolig dag på båten til Bergen. Så ble det togtur igjen, denne gangen til Hønefoss. Derfra kom de seg hjem via Bø og Nissedal, delvis til fots. Slikt gir utvidet horisont og tro på at jenter kan mestre det samme som gutter.» (K.F.U.K.- Speidernes Blad Nr.10 Julen 1924)

Så, alltid budd – sjølv på jula!

adventskalender.jpg#asset:1176


Gudbrandsdalsmusea sin adventskalender byr på levande historiar kvar dag fram til jul. Vil du vere med, så heng på her inne, eller følg oss på Instagram eller Facebook.

FOTO: Norsk speidermuseum

Dagens post er henta frå avdelinga Norsk fjellsenter.

Skrevet av Jorun Vang

Publisert den 09.12.2021

jorun.vang@gudbrandsdalsmusea.no